ಕಂದ ಪದ್ಯ

   
    ∆ ಕಂದ ಪದ್ಯ ∆

       *ಭಿಕ್ಷಾಟನೆ*

ಭಿಕ್ಷುಕ ನಾ ಭಗವಂತನ|
ಸಾಕ್ಷಿಯಲಿ ಕರವನು ಮುಗಿದು ಕೇಳೆ ಕೊಡುವಿರಾ||
ಅಕ್ಷಿಯೊಳು ನಲುಮೆ ತುಳುಕಿಸಿ|
ಭಿಕ್ಷೆಯ ರೂಪದಲಿ ಮಾನವತೆ ನೀಡುವಿರಾ||೧

ಒಲವಿನ ಜಲವ ಹುಡುಕುತಲಿ|
ಅಲೆದೆನ್ನೆಡೆ ಕೊಂಚ ಬೊಗಸೆಯೊಳು ಹುಯ್ಯುವಿರಾ||
ಜೋಳಿಗೆಗೆ ಒಂದಿನಿತು ಹಿಡಿ|
ಕಲಿತ ಜ್ಞಾನವೆನಗೂ ಸುರಿದು ಹರಸುವಿರಾ||೨

ಲಕ್ಷ ವರಹವನು ಒಪ್ಪೆನು|
ವಕ್ಷದೊಳಗಣ ಸಿಹಿ ಮಮತೆಯನು ಹನಿಸುವಿರಾ||
ರಕ್ಷಕ ನೇಮಿಪ ನೀತಿಯ|
ಕಕ್ಷೆಯೊಳು ಗಳಿಸಿದ ಸುಕೃತವ ತುಸು  ಎರೆವಿರಾ||೩

ಬಲ್ಲಿದರಾದೊಡೆ ಭಿಕ್ಷುಕ|
ನಲ್ಲಿ ಅರಿವಿನ ನುಡಿದಾನವ ಕರುಣಿಸುವಿರಾ||
ಇಲ್ಲದಿರೆ ಜೊತೆಗೆ ಬನ್ನಿರಿ|
ಎಲ್ಲಿದೊರೆವುದೆಂದು ಕಾಣ್ವ ಜೊತೆಯಾಗುವಿರಾ||೪


    *ತ್ರಿನೇತ್ರಜ್*