ಹಾಸ್ಯ ಕವನ
#ಹೀಗೊಂದುಸಾರಿ...
ಕವಿ - ಶಿವಕುಮಾರ ಹಿರೇಮಠ
ಚೌತಿಯ ದಿನದಿ ಗಣಪನ ಪೂಜೆ
ಮನೆಯಲಿ ನಡೆದಿತ್ತು
ಸಿಂಗಾರ ಮಾಡಿದ ಮಾಡಲಿ ಮೂರ್ತಿ ಕೂಡಿಸಲಾಗಿತ್ತು
ವಿದ್ಯುತ್ ಲೈಟು ಪಟಾಕಿ ಘಾಟು
ಸಂಭ್ರಮ ಹೆಚ್ಚಿತ್ತು
ಗರಿಕೆ ಹೂವನು ಹಿಡಿದ ಅಣ್ಣನ
ಪೂಜೆ ಸಾಗಿತ್ತು
ಅಕ್ಕನ ಕೈಯಲಿ ಸುರುಸುರು ಬತ್ತಿ
ಫಳಫಳ ಬೆಳಗಿತ್ತು
ಕಣ್ಣರಳಿಸಿದ ತಂಗಿಯ ಮುಖದಲಿ
ಕಿಲಕಿಲ ನಗುವಿತ್ತು
ಅಡಿಗೆಮನೆಯ ಮೋದಕ ವಾಸನೆ
ನನ್ನನು ಸೆಳೆದಿತ್ತು
ನೈವೇದ್ಯಕೆಂದು ತಟ್ಟೆಯು ಬರಲು
ಆಸೆಯು ಹೆಚ್ಚಿತ್ತು
ಎಲ್ಲರ ಧ್ಯಾನವು ಭಕ್ತಿಭಾವದಲಿ
ಮುಳುಗಿ ಹೋಗಿತ್ತು
ನನ್ನಯ ಚಿತ್ತವು ಮೋದಕದತ್ತಲೆ
ಪದೆ ಪದೆ ಹರಿದಿತ್ತು
ಲಗುಬಗೆಯಿಂದ ಮೋದಕ ಸವಿಯೊ
ಆತುರ ಮೂಡಿತ್ತು
ಸಮಯವ ನೋಡಿ ತಟ್ಟೆಗೆ ನನ್ನಯ
ಕೈಯದು ಚಾಚಿತ್ತು
ಎಲ್ಲಿತ್ತೇನೋ ಇಲಿಯೊಂದಾಗಲೆ
ತಟ್ಟೆಗೆ ನುಗ್ಗಿತ್ತು
ಮೋದಕದಿಂದ ಘಮಘಮ ಗಂಧ
ಅದಕೂ ತಲುಪಿತ್ತು
ಚಿಟ್ಟನೆ ಚೀರಲು ಅಕ್ಕನ ಮೇಲೆ
ಇಲಿಯು ಎಗರಿತ್ತು
ಅವಳೆಗರಾಟಕೆ ಅಕ್ಷತೆ ಮೋದಕ
ಚೆಲ್ಲಾಪಿಲ್ಲಿಯಾಯ್ತು
ಹೆದರಿದ ತಂಗಿ ಅಣ್ಣನ ಹಿಡಿಯಲು
ಪಂಚೆಯು ಉದುರಿತ್ತು
ತೀರ್ಥವು ಹಾರಿ ಅಕ್ಕನ ಮುಖಕೆ
ಅಭಿಷೇಕ ಮಾಡಿತ್ತು
ಗಲಾಟೆಯಿಂದ ಮೂಷಿಕರಾಜ
ತಪ್ಪಿಸಿಕೊಂಡಿತ್ತು
ಅಕ್ಕ-ಅಣ್ಣನ ಸ್ಥಿತಿ ನೋಡಿ ನಮಗೆ
ಮುಸಿ ಮುಸಿ ನಗುಬಂತು
.... .... .... .... .... .... .... ....
*ತ್ರಿನೇತ್ರಜ್*