ಬಾ ಹೋಗೋಣ ಶಾಲೆಗೆ

         
     ಬಾ ಹೋಗೋಣ ಶಾಲೆಗೆ

'ಅಕ್ಕ ನೋಡೆ ಶಾಲೆದಿರಿಸಲಿ
ಹೇಗೆ ಒನಪಾಗಿ ಹೋರಟಿಹರು!
ಅವರು ನಮ್ಮಯ ಸ್ಥಿತಿ ನೋಡಿ
ಗೇಲಿಯ ಮಾಡಿ ನಕ್ಕಾರು'..?

ಸಂತೈಸಲು ತಮ್ಮನಿಗೆಂದಳು,
'ಅವರತ್ತ ನೀ ನೋಡದಿರು.
ನಮ್ಮ ಭಾಗ್ಯವಿರುವುದಿಷ್ಟೇ,
ತರುವ ಬಾ ಕೆರೆಯ ನೀರು.

ಇವರ ಕಂಡು ಮರುಕಗೊಂಡು
ಬಾಲೆಯರು ಇವರ ತಡೆದರು.
'ಶಾಲೆಬಿಟ್ಟು ಎತ್ತ ಹೊರಟಿರಿ'?
ಎಂದವರನು ಕೇಳಿದರು.

ಅಕ್ಕ ತಮ್ಮ ಮುಖನೋಡಿಕೊಂಡು
ಬೇಸರದಿಂದಲೆ ನುಡಿದರು.
'ಶಾಲೆಗೆ ಎಂದೂ ಹೋಗೇ ಇಲ್ಲ.
ನಾವು ಕೂಲಿಮಾಡೋ ಬಡವರು'.

ಚಿಂತಿಸದಿರಿ ನಿಮ್ಮವರಿಗೆ
ತಿಳಿಹೇಳ್ವೆವೆಂದರಾ ಬಾಲೆಯರು.
ಶಾಲೆಗಾಗಿ ನಾವು ನೀವು;
ನಿಮ್ಮ ಹಕ್ಕು ಕೊಡೆಸುವೆಂದರು.

ಶಾಲೆಗೆ ಸೇರಿಸುವರೆಂದು ಅರಿತು
ಮಕ್ಕಳು ಸಂತಸಗೊಂಡರು.
ಕೂಲಿ ತೊರೆದು ಶಾಲೆ ಸೇರಿ
ಓದಲು ಉತ್ಸುಕರಾದರು.
..... ...... ...... ...... ..... ...
✍... ತ್ರಿನೇತ್ರಜ.
        ಶಿವಕುಮಾರ. ಹಿರೇಮಠ.